Dinah Makabayan

Public • Just now

Anyeong nangyari sa Ban xang it ho?

Hoy, CHED— ano ‘tong narinig kong itutuloy n’yo na ang pagtanggal sa Filipino sa college— anyeong ginagawa mue?!

Matagal nang natatanggal ang mga Filipino sa kolehiyo! June 14 nga ng taong ito nang i-anunsyo ng DepEd na 3.6 milyong mga kabataan na nasa edad 16 hanggang 24 ang itinuturing na “out-of-school youth.” Napakaraming kabataang Filipino ang hindi na tumutungtong sa kolehiyo tapos tatanggalin ninyo ang Filipino? “Been there, done that” na raw ang mga hindi makapag-aral.

Kusa rin namang natatanggal ang mga Filipino sa kolehiyo; hindi nga mabilang ang mga nagda-drop at nag-i-stop sa pag-aaral dahil sa ke mahal-mahal ng matrikula. Magta-trabaho na lang raw sila bilang call center agent, at least malaki ang kita. Aba’y natalo na nga natin ang bansang India kung paramihan at palaguan lang ng BPO industry ang labanan. Meaning, tayo ang takbuhan ng mga banyagang kompanya para sa murang lakas paggawa!

E papaano ba naman, maski makatapos ka sa kolehiyo ay mahirap pa ring humanap ng trabahong aakma sa kinuha mong kurso. Pero ‘di bale, natuto ka naman mag-ingles, ang pagiging fluent at pasensyoso mo sa mga banyagang kostumer na galit na galit sa kanilang internet (e buti nga mabilis ang internet sa kanila) at naglolokong gadget atbp. ang maaaring magsalba sa ‘yo sa kahirapan.

Kaya nga lang, noong Enero lang ng taong ito sinabi ni Socioeconomic Planning Sec. Ernesto Pernia na maaaring sa loob ng tatlo hanggang limang taon ay mga Software, Robot, o Artificial Intelligence na lang ang pumalit at gumawa ng “low-skilled jobs” sa industriya ng BPO. 43 milyong katao ang maaaring mawalan ng trabaho rito, sabi ni Rey Untal, presidente ng Business Process Outsourcing Association of the Philippines. Kung puwede sanang mga robot o AI na mas marunong mag-isip at magdesisyon ang maupo sa ating gobyerno, ano?

Tsaka hindi lang naman sa kolehiyo tinatanggal ang Filipino, CHED! Look, o. Talamak ang EJK. Daming patay sa daan! Kung hindi ka naman mababansagang nanlaban e mamamatay ka sa gutom bunsod ng TRAIN Law. In fairness, kitang-kita kung gaano karupok ang ekonomiya ng bansa, marupok dahil napakabilis magmahal! 6.7% inflation rate pa lang, tanggal na ang Filipinong walang trabaho at walang makain!Dapat ba naming ipagpasalamat na idadagdag niyo naman ang Hanggul bilang elective sa senior high school? Well, thank you ha kasi kalaunan hindi na kami maduduling sa panonood ng K-drama at malilito kung panonoorin ba ang nangyayari o babasahin na lang ang subtitle. Hindi na rin kami aasa sa mga translation ng paborito naming kantang K-pop. Pero ganito nga ba ang Nasyonalismo?

Malamang, hindi! Hindi nito pinapakita ang pagmamahal sa sariling bansa at sa sariling pagkakakilanlan nito. Paano na lang natin mapapatunayang mahal nga natin ang ating bansa kung hindi naman natin kayang gamitin ang natatangi at pambansa nitong wika?

Ika-16 na siglo noong sinakop tayo ng mga Kastila, maski mga mananakop ay pinag-aralan ang ating mga wika upang mas mapasunod tayo nang maayos— habang ipinagkakait nilang ituro ang wikang Kastila nang hindi malaman ng mga “indio” kung paano sila niloloko.

Ngayon, wika ng mananakop naman ang gusto ninyong ipalaganap upang malimutan namin kung sino kami. Mali.

Nakakahiya sa ating espesyal na bisita kamakailan lang. Hindi n’yo ba na-imagine kung ano na lang ang sinabi ni Xi Jin Ping nang marinig niya ang balitang ‘di ituturo ang Pambansang Wika sa Kolehiyo?

Ano na lang kaya ang naging usapan nila ng ating Gob. Heneral. Rodrigo “Di Gong” Roa Duterte? Ganito kaya?

“Mr. Digong, let me ask you something about our citizens.”, tanong ni Xi.

“What is it, Prime Minister?”, sagot ni Di Gong.

“Does your constituents know how to speak our National Language?”— malamang, nang itanong ito kay Gob. Hen. Di Gong ay natulala siya. Napayuko sa pagkadismaya sa sarili. “Paano na lang ang mga mamamayan ng Philippine Republic of China nito?”, marahil napaisip siya.

Kaya ituro ninyo ang Mandarin! Pagtibayin ang wikang Makabayan— bilang probinsya ng Tsina kung saan ‘di kumpleto ang birthday handaan nang walang pancit at lumpia, ipinagdiriwang ang Chinese new year, naniniwala sa Feng Shui, nagpapaputok upang itaboy ang malas tuwing bagong taon, lugar ng mayamang anyong-tubig, Spratly at Scarborough— ituro ninyo sa amin ang wikang xa atin, ang wi cang ped xing.

Papaano na lang kami magiging magaling na factory worker sa Beijing o magiging magaling na Caregiver sa Hong Kong kung hindi, CHED— Chinese Education under Di gong, Colonial History through Education and Disciplines, Commission on Hegemonic Entities and Delusion?

Kung gagawin ninyo kaming mga atsay ng banyaga, gawin ninyo kaming magagaling na atsay. Globally-skilled and competitive. Marunong manilbihan sa ibang ibayo. Ayaw sa sariling tahanan. ■

(Images used owned by Rappler and Reuter.)

Comments

Your email address will not be published.


*


Opisyal na lingguhang pahayagan ng mga mag-aaral ng Unibersidad ng Pilipinas-Diliman